Gebed
Gebed is nie werk nie. Gebed is verwondering en rus. Karl Barth het boekie oor gebed geskryf en herinner ons dat die blote verwondering dat ek juis met God mag en kan praat reeds gebed is. Gebed is die gawe van “gehoor” wees asook die gawe van luister na God ook in my eie hart. In gebed val die maskers wat ek voorhou vir die wêreld. Kom ek na God toe, soos ek is, maar met die wete dat ek tuis is, altyd verwelkom word.
Gebed is nie werk nie, dit is om te rus by God en bewus te word van God se tyd en God se manier wat nie noodwendig my tyd of manier is nie. Gebed is reflekteer en stilbly, smeek en bloot wees. Gebed is die erkenning dat God nooit ver is nie. Gebed is die soeke na wysheid en onderskeiding in hierdie wêreld waar ons gebombardeer word met te veel inligting, "input" en opinies. Gebed is die “laat” van Galasiërs 5, die toelaat vir die Heilige Gees om in my te werk en my al hoe meer die beeld van God gelyk te maak. Gebed is God se guns.
