Swanger tyd
Advent is ryp tyd, vol tyd, dun tyd. Dit is swanger tyd. ʼn Tyd vol smag en verwagting.
Advent beteken letterlik “koms” en hierdie vier Sondae voor Kersfees is dié tyd in die liturgiese jaar dat ons tyd kry om na die koms van Christus te verlang.
Soos Maria, en enige vrou in haar laaste maand van swangerskap, moet wag, is dit vir ons ʼn tyd van ongeduldige wag op vervulling.
Ons word herinner aan die geboorte van ons Verlosser, maar ons verlang dat ons Verlosser weer sal kom en alles sal vervul.
O kom, o kom, o Môrester,
ons sien alreeds u lig van ver.
Verdryf die newels van die nag,
laat skyn u helder lig met prag.
Wees bly, wees bly, o Israel –
Hy is naby, Immaneul.
(Lied 320, Liedboek van die kerk)
