Gansbaai Munisipaliteit beplan ‘n gesellige Loslitdag-optog ten bate van die Tehuis vir Gestremdes te Elim op Vrydag, 6 September. Alle geregistreerde deelnemers aan Loslitdag, wat deur ABSA geborg word, word uitgenooi om met oorgawe aan die verrigtinge deel te neem. “Ons geniet elke jaar hierdie lekker en vrolike dag, maar besef ons regtig dat dit oor gestremdheid gaan?” - Gansbaai Munisipaliteit. Alle besighede, groepe en individue van Gansbaai word genooi om by die munisipaliteit se optog aan te sluit. “Bring jouself, jou groep, ‘n groot ‘smile’, ‘n groot gees en jou bydrae!”
Groepe kan elk op ‘n unieke manier en prettige uitrustings, bykomstighede en plakkate van hul eie keuse aan die optog deelneem. Alle Gansbaaiers word uitgenooi om te kom kyk, saam te stap en ook deur die loop van die oggend enige bydraes te kom uitpak “en kom maak met ‘style’ en ‘n ‘smile’ ‘n verskil in gestremdes se lewens”. Die beplande optog begin om 07:00 by die helikopter-landingstrook (oorkant Gansbaai SAPD) en die optoggangers stap dan met Hoofstraat langs tot by die munisipale kantore. Daar sal haaie en walvisse in kalk-buitelyne wees wat met nie-bederfbare produkte soos blikkieskos, skoonmaakmiddels, toiletware, lekkers, klere, skryfbehoeftes ensovoorts volgepak kan word. Lees in volgende week se Gansbaai Courant meer oor die Elim Home en Mizpah School in Elim.
Vir navrae oor die optog kan Marzaan Middleton van Gansbaai Munisipaliteit by 028-384-8300 gekontak word.
Hardus Botha
